2016年8月10日 星期三

練乙錚 Joseph Lian Yi-zheng (2)：'Political reform is dead,' 群眾轉向　天下三分

【專訪練乙錚．下】群眾轉向　天下三分

2016/8/8 — 19:52
練乙錚
練乙錚
佔領運動過後，泛民主派及傳統社運圈的路線飽受批評，本土派在連場「勇武」行動中急速冒起，一次旺角騷亂、一場新東補選，更令本土派隱然與建制、泛民有三分天下之勢。但今屆立法會選舉中最有望能晉身立法會的本土派人物、「本土民主前線」發言人梁天琦，卻被港府橫加阻止，無緣議會，這對立法會選情以及泛民、本土的勢力分佈，有何影響？
而立法會選舉臨近，來年的特首選舉亦將至，「雙曾」已磨拳擦掌，挑戰尋求連任的梁振英，立法會選舉結果對特首選情影響至鉅。2012年6月，梁振英上任前夕，練乙錚曾預言在梁振英任內五年，西環將重點整頓香港五大方面：法治、學術、公務員、警隊、傳媒，四年來上述範疇逐一陷落，確認書風波令「公務員」一塊亦瀕失守，僅餘「法治」負隅頑抗，風雨飄搖。接下來一屆特首任期，香港的局面會如何惡化下去？
*　　　*　　　*
港獨思潮與非建制分裂
《立場》：本土／港獨派崛起之時，被批評為排外、不擇手段，這是否新派系崛起的必然代價？
這是個鐘擺現象。一個勢頭冒起之初，梗係會過咗籠，但撞到埋牆，就會回頭擺過另一面，不可能一出來就走在正途之上。初初出來，出得唔靚，人們就不喜歡、不看好，他們就會發現做法不太可行，自己會修正。

同時，不滿的民眾慢慢都會覺得共產黨真係「該煨」，唔怪得年青人，生出同情。初初係不可容忍，但本土運動慢慢會變成一個可接受的東西，慢慢匯入政治主流。你睇人口變化：而家後生仔18-30嘅年齡層，有四成支持獨立，可謂前所未見。
三分天下的過程會生出很多矛盾，此乃必然。
港獨去到後尾，都係要公投。不論何種主張，最後都要透過公投解決；除非流血革命、七百萬人全部揸槍上陣趕走解放軍，成立香港民主共和國，唔需要公投…不然，香港要達到自決，還是要通過公投。而家獨派即青年新政那些，都係講推動公投，只不過時間上五年、定十年。
其實團體之間，牙齒印、意氣，又話人小政棍，而家梁天琦又話自己係政棍，但實際上，客觀上的分歧是誇大了。無咩㗎，後生仔之間拗啲好無聊嘅交，過後諗吓就知道好無謂。後生仔之間嘅嘢，我費事講咁多。
《立場》：你在去年中提出香港可借鑑台灣的「暴力邊緣論」，但年初一的旺角騷亂，已逾越這條紅線。本土、港獨派不斷提倡「革命」，你如何看待武力／暴力與本土、港獨派的關係？
講返馬列主義。
馬列講的是高度工業化、城市化社會內的革命，毛澤東那套「農村包圍城市」、列寧那套，是另外一種情況。香港若要借鑑，也是借鑑返馬列。馬列歌頌暴力，但歌頌得來有個譜：暴力是幾時用？是瓜熟蒂落，最尾一下，舊社會過渡到去新社會，切臍帶時所用。周不時都打打殺殺唔得㗎。馬列是這樣想的。
革命是意思其實是什麼？不是暴力革命嘛。不是嗰支歌仔。警察打落嚟還手，那無問題，是人的本性反應，但（香港）不可以搞城市遊擊隊、拿住武器周圍同警察對抗，你無得同佢打。
不需有無謂犧牲，犧牲得來，要有回報。如果話要犧牲，就是「暴力邊緣論」，你一路踩佢條紅線嗰度，搏佢一係後退、一係殺落嚟。以和平的方式，一路迫埋去，他（政府）若「殺落嚟」，就輸了道義。
無謂在這個問題上，浪漫化咗佢。基本上，我不認為暴力在香港社會有太多角色，暴力在香港社會的角色應該趨向零。
《立場》：在北京強硬打壓之下，本土／港獨派進一步擴大，傳統泛民的空間會否越收越窄？
民主派內部分化，我覺得也是鐘擺效應。早幾年一路分化，但我估計目前有個轉機，就是今次的選舉：政府的做法，客觀地撮合了民主派中人。鐘擺擺向一邊時，你冇辦法阻止分裂，但調返轉頭，在一些客觀情況，鐘擺又會向另一個方向擺動。
你睇，梁天琦有法律問題，邊個同佢打官司？係泛民元老Martin（李柱銘），這某程度上已拉近了一些人之間的距離。而「確認書」引起法律界全面反彈，包括法政匯思也表態，而法政匯思的領袖（任建鋒），一向都不滿本土派，但也要為他講說話。講到底，我一向認為大家坐同一條船，只係背景、傾向、脾性等等搞到好大仇口。
而意識形態方面，都可能有一種趨同。林榮基講港獨之後，引起好多老一輩人共鳴（註1）。
我前兩日喺街邊，有個阿伯問我係咪練生，我同佢傾咗廿分鐘。佢話，班細路講港獨，都唔係話咁戇居，只不過做唔做到係問題囉。一個五、六十歲的退休教師，覺得港獨有其道理，打壓得咁交關，怪得啲後生仔咩？港獨對他而言，不過是可行與否的問題，而不是價值觀念問題。這不是價值觀念轉化是甚麼？
當然這只是一個例子，但風向是否正在改變，民主派的群眾，是否正在轉向？我估計可能係。如果老一輩群眾轉向，老一輩人的政黨領導，就唔能夠唔轉向。
但三分天下將會長期存在。始終，會有一班人接受不到自決，問題只在兩者比重如何轉化。（不接受自決的非建制派）有其市場，但他們會收縮。後生仔進入投票年齡，會令整個變化加快。
但我不希望中間派、傳統泛民消失，否則會很危險。一如台灣，若無國民黨，共產黨已經打咗過去。國民黨令共產黨覺得仲有希望，可以透過佢做啲工夫，唔使出最辣果一招。如果無咗（國民黨），個個都台獨，仲唔打過去？
所以，你唔好希望泛民消失，我唔希望佢消失㗎。
《立場》：你本人對「港獨」的立場為何？
只要有一種或多種做法，可以有效抵擋香港赤化，我都支持。港獨係一種聲音、自決係一種聲音，一國兩制永續又係一個聲音，我都支持。邊個啱、邊個唔啱，我判斷唔到，有效、能夠抵擋住赤化，保存香港一啲好嘅嘢，就得。
呢個係我嘅底線、我嘅目的，所以我咁睇。我願意為不同立場的人提供想法，搞港獨點搞，自決公投點做，又同傳統泛民諗啲計，這是我的角色。
總的嚟講，我不希望個社會分裂得這麼厲害，不想出現很暴力的場面、太多紛爭。但你唔想又點？佢會發生。我是一個觀察者，不會做太多價值分析，判斷好定唔好。你煮到嚟我唯有咁食。
*　　　*　　　*
立法會選舉與特首選舉
《立場》：你對九月選舉的結果樂觀嗎？
我唔悲觀，但有幾好成績，我唔敢講。我覺得只要一個傘兵入到立法會，都係一個勝利，後生仔的勝利。而家有講法話，你班人搞革命點解走入議會？這種說法很無稽，馬克思、恩格斯全部都是兩條腿走路，不只搞工人運動，都搞議會選舉。
《立場》：九月立法會大選的結果，會否令北京調整對港政策？
九月選舉好關鍵。對共產黨而言，九月選舉重要過下次特首選舉，因為特首選舉無走雞，十拿九穩；梁振英同曾鈺成打打殺殺之嘛，但邊個做，都係佢馬仔，佢定過抬油。9月選舉（北京）先至頭大，萬一後生仔真係入咗閘，點辦？
所以，佢（北京）今次盡地一煲，乜策略都用齊，反彈、以後會點樣，唔理喇。佢今次的做法（指取消梁天琦等人資格）好狼狽，代價係非常之大。
但如果保皇黨大勝，反建制一方就要調整。其中一個要思考的是「大台」的問題。而家覺得大台唔重要、八仙過海各顯神通就最好，這一點無法先驗去解答，唯有通過選舉知道答案。若今次大敗，後生仔要諗，可能某種形式的大台，都係要嘅。
而如果九月保皇黨輸得好慘，佢哋會有大幅調整，可能會畀胡鬚曾（曾俊華）上台。…撼頭埋牆都仲唔回頭？如果（建制）今次輸得好慘，梁振英會落台。
《立場》：但佔領運動後，外界也估計北京會放寛對港政策，結果卻不然。
（梁班子）未到埋牆，都唔回頭啦。仲係嗰班人在台上，政策點會調整。當權者內部都有矛盾，台上嗰班如果而家急轉軚，咪表示台下班人贏咗，佢仲點樣連任？所以佢唔可以扭軚，一路要剷落去。
撐到9月，睇下點樣，呢個9月係關鍵。
《立場》：梁振英上任前，你曾經預測，當權派將重點整頓香港五大方面：法治、學術、公務員、警隊、傳媒。未來數年，整頓會更厲害嗎？香港局勢會如何發展？
法治最終都可能淪陷。所以佢（梁政府）咁著緊在港大做低陳文敏、整治港大法律學院，下任院長由誰出任，佢會話事。社運擺力量撐住法治，好重要，但有啲位你守唔到，佢委任人係佢嘅權力。
這樣情況就會很不利。社運嘅人，目前都仲可以靠住司法體制，但到司法淪陷，再無出路，就可能會出現暴力革命。封住個鐵罐猛煲，唯有爆。
咩情況下，會出現這樣的局面？今次立法會建制贏晒，梁振英因此可以連任，做多五年。一路咁去強化佢門面上嘅勢力，逼到人冇碇企，體制內包括警察、法庭、大學的管治委員會，全部都是其統治意志，下面啲人點？始終都會爆發。可能會是魚蛋革命那樣的情況，但是十倍咁強。
*　　　*　　　*
註1：林榮基的「港獨論」，練乙錚曾在6月23日《信報》專欄〈烏坎：民主的極限、自決的起點〉 作以下分析：
「林榮基談港獨，筆者的感覺是他並非像一些年輕人問政團體那麼斬釘截鐵提倡港獨，而不過是覺得『一國兩制』既無出路，退而求港獨亦未嘗不可。但是，這樣子看港獨，意義也許更強烈。
年輕港人提倡港獨，與年輕台人傾向台獨一樣，含有『天然』成分；這個『天然』，就是經濟學裏說的『偏好』，而偏好是不必太費神去解釋的，甲喜假日飲茶而乙愛行山，各適其適，毋庸爭議，很簡單。但是，像林榮基那樣不是『天然獨』，而是在某種因果作用之下接受了或者包容了獨立思想的話，就麻煩了。
有人會聽說林榮基眼看『一國兩制』既無出路、認為退而求港獨亦未嘗不可，想着想着也覺得有理，於是就漸漸同情港獨。因偏好而不同的人之間，就少了這一種『指導效應』。」



Joseph Lian Yi-zheng, a veteran commentator whose long-term column at a prominent newspaper was cancelled recently, said any further political reform the government proposes will be a “fraud,” and politicians should focus on securing Hong Kong’s freedom under China’s tightening grip.

'Political reform is dead,' says veteran commentator Joseph Lian | Hong Kong Free Press
Joseph Lian Yi-zheng, a veteran commentator whose long-term column at a…
HONGKONGFP.COM|作者：KRIS CHENG

張貼者： 於

沒有留言:

張貼留言

訂閱： 張貼留言 (Atom)

網誌存檔